Ordførarmiddag og kokkekunst på ungdomsskulen

- Vent litt, no blei eg veldig stressa. No må dei snart bli ferdige!

Ein tenåringsgut lener seg over ei stor gryte med poteter, der det så vidt har byrja å boble i vatnet. Rundt han er det ein jamn ståk av skramlande oppvask, susande kjøkenvifter og ungdomslatter.

Det er matmanifestival på Blussuvoll ungdomsskule. Elevane i 9. trinn skal lage treretters middag og velkomstdrink til 60 personar.

- For dei aller fleste her er dette første gongen at dei lagar mat til så mange. Det er ei stor oppgåve, seier mat- og helselærar Wenche Liabø. 

- Eg blir starstruck

Matmanifestdagen er blitt arrangert i Trøndelag sidan 2011. Blussuvoll var med i det første året, og har deltatt fleire gongar sidan.

Lokale råvarer står i sentrum. Her kokkelerast det med lokale ingrediensar, som skal bli til velkomstdrink, finnbiff, bidos og samiske festbrød. Det heile blir krona med ei ostekake til dessert.

Med ein slik meny, er det ikkje rart at dette er ein skuledag meir hektisk enn til vanleg.

At ordføraren er venta å ta turen, hjelper nok heller ikkje på nervene.

- Eg blir starstruck, kjem det frå ein gut på veg ut frå kjøkenet.

No har han fått beskjed om å mingle, som seg hør og bør for godt vertskap.

Om matmanifestdagen

Matmanifestdagen er ei årleg hending, som skjer den andre onsdagen i februar. Dagen er ei feiring av trøndersk mat og drikke, og det blir arrangert matlaging i heile regionen. Grønn Barneby bidrar med økonomisk støtte til innkjøp av lokale råvarer ved skular i Trondheim og Malvik, og Oi! mat og drikke er arrangør.

Markeringa har vore fast sidan Trøndersk Matmanifest tok form i 2011. Dette er eit dokument som skal skape meirverdi, styrke og vidareutvikle trøndersk matproduksjon og matkultur. Manifestet er det første av sitt slag i verda. 

Når enden er god

Omtrent samtidig som det byrja å koke i potetene, senka roen seg hos flesteparten av elevane.

Ein etter ein blir rettane ferdige, og plasserast ut på bordet.

Sverre har laga finnbiff for første gang i livet.

- Men eg har smakt det før, og det er ok. Eller, eigentleg er det ganske godt.

Maten kjem på bordet, både elevar og gjester skryt av maten. Ja, til og med ordføraren seier at det smakte. 

Og då er som kjent allting godt.